Artigianau e stima de is custumanzias e de is artis de su passau. Capassidadi e futtesa in su traballu de custas artis de sa Sardigna nostra. Funt custas is crais de s’arrennescimentu de sa fiera de su tappetu de Moguru chi at a aberri po is appassionausu de is cosas fattas a manu cenabara 29 de su mesi de Argiolas 2011 faci'ora de is ses de merì. Po segàret su nastru de s'inghitzu impari a su sindigu Sandro Broccia, a sa consillera delegada po s'artigianadu Luisa Broccia e a s' amministratzioni comunali chi at organizzadu sa manifestatzione ci at a essi su cantadori Paolo Fresu, chi s'at a esibì a pustis, de is noioras e mesu, in sa pratza de su Cramu. Aratzus, tappetus, cassapancas, prendas e prodotus de su coxinare nostru ant a abarrai in ammostru in pratza de is Martiri de sa libertadi totus is dies de is 10 a is 21 fintzas a dominigu 4 de Cabudanni. Fiat su 1961 candu unu scantu tessingianas e maistus de linna guidadas de su sindigu de cussus tempus Efisiu Lippi Serra e de s’amministrazione comunali iant cumintzau a donai fida a custa importanti e famada fiera de su tappetu.

Su scopu fiat istau de torrai a bogai a pillu custas artis nodidas de s’antigoriu e de ainci podi educai sa genti arranguitzendiddus a prosighiri custas artis sena de traixi is genias de traballamentu de is mollus disignus e mostas chi iant sinnau sa stòria de is popolaus de is logus nostus. Propriu cumenti si ligit is su cumbidu de su 1962 po su segundu annu chi si fiat fata. Po tres annus sa fiera fiat durada feti su 19/20 e 21 de maju propriu is tres dis de festa de Santu Brannadiu, patronu de Moguru, e pustis unu trasiu de 15 diis e pustis ancora fiat duràda po tres cidas, cumenti mudada puru est istada in s’andai de su tempus sa data de abertura e serrada chi est passada de su mesi de maju a cussu de austu po arribbai a dda fai s’urtima cida de su mesi de argiolas e fintzas de sa primu cida de austu, prosighendi a pustis de dda lassai aberta finzas a is dis prima de s’Assunta (ferragostu).

Est unu momentu bellu de attobiu po is comporas e sa cultura, pruscatottu po medas sardus istrangius e turistas chi approbiant de ognia logu no feti po si gosai su mari, is montangias e su sobi ma po fai comporas de custas prendas nodidas de custas artis e mestieris. E propriu grazias a custas beridadis chi sa idda de Moguru est de tempus connota cumenti a logu importanti de incontru de is artis e mestieris de tottu sa Sardigna, fadendisi apprezzai in continenti, in s’europa e in su mundu. De su 1966 sa fiera s’est aberta puru a is atrus artisanus de atrus logus de sa Sardigna e ammanniendi is apposentus hat pozziu accabidai atras oberas artisticas ingegnosas donendi puru sa possibbilidadi de bi’ e aprezziai mellus tottu custus traballus postus in ammostu. A cumenzai de s’annu 1961 sa mostra beniat fatta me is localis beccius de sa scolla media, a dus passus de sa cresia de su Cramu, a pustis callincun’annu fut istada tramudada in su casamentu scolasticu de is elementaris in prazza de Sant’Antiogu, inni fut abarrada po annus meda, grazias pruscatottu a is amministrazionis comunalis, a is direttorias artisticus e a s’aggiudu preziosu de sa “Pro Loco”, sa Cantina il “Nuraghe” e e su Premiu Litterariu “ Marmilla”, ottenendi aprezziu mannu de parti de sa genti e de is criticus de tottu is logus. Cun is traballus de arrangiamentu de custus localis, in su 1995 sa fiera fut torràda a is localis nous de sa scolla media, po teni s’approdu a pustis in su 1999 in su Centru Polifunzionali chi est istau fattu a posta po arriccì sa vetrina de s’artigianau me is localis atrezzaus cumenti si spettat abi sa scenografia de is ammostus benit curada e sighida cun futtesa e capassidadi manna cun s'agiudu de s'ex “Isola”.

Ma sa fiera ollit nai puru momentus de intrattenimentus. A issa est istau integrau su calendariu de is attobius culturalis e artisticus: sonus, cantus, ballus poesias, teatru e atrus intrattenimentus de s’istadi mogoresa chi agatant sciogu proprou in custa vetrina importanti.